सावित्रीबाई फुले पुणे विद्यापीठाशी संलग्न असलेल्या श्री शिव छत्रपती महाविद्यालयातील मराठी विभागाची स्थापना सन १९७० मध्ये पदवी अभ्यासक्रमासाठी, तर १९९५ मध्ये पदव्युत्तर अभ्यासक्रमासाठी करण्यात आली. कला, वाणिज्य आणि विज्ञान या तीन प्रमुख विद्याशाखांमध्ये कला शाखेअंतर्गत मराठी विषय विशेष (Special) आणि सामान्य (General) स्तरावर शिकवला जातो. राष्ट्रीय शैक्षणिक धोरण (NEP) २०२० च्या अनुषंगाने विभाग बहुविध शैक्षणिक संधी, कौशल्य विकास, संशोधनवृत्ती आणि रोजगाराभिमुख शिक्षण यावर भर देतो. विद्यार्थ्यांची विश्लेषणात्मक क्षमता, भाषिक अभिव्यक्ती आणि सृजनशीलता वाढवण्याच्या दृष्टीने अध्यापन व अभ्यासक्रमाची रचना केली जाते. या विभागाचे पहिले प्रमुख दिवंगत माजी प्राचार्य डॉ. व्ही. डी. कासार होते. त्यानंतर विभागात प्रा. कटारे, प्रा. देशमुख, प्रा. कु. रोहिणी जोशी, डॉ. बी. टी. शेळके आणि डॉ. जे. पी. खाडे यांनी विभाग प्रमुख म्हणून मोलाचे योगदान दिले आहे. सध्या विभागप्रमुख म्हणून प्रा. डॉ. वंदना विनायक नढे कार्यरत असून त्या मराठी विभागाचे शैक्षणिक आणि प्रशासकीय नेतृत्व समर्थपणे सांभाळत आहेत. मराठी विभागाची शिक्षणपद्धती विद्यार्थी-केंद्रित असून नव्या तंत्रज्ञानाचा समावेश, स्थानिक व जागतिक साहित्यिक प्रवाहांचे आकलन, तसेच भाषा-संस्कृतीचा सखोल अभ्यास घडवून आणण्याचा सातत्यपूर्ण प्रयत्न विभागाकडून केला जातो.